Skakkesenteret i Etne – eit praktbygg og storstove for Etnebuen
by Bente Kjos-Wenjum - dagleg leiar on februar 16, 2012
Skakkesenteret - senter for skule, idrett og kultur - i Etne er no offisielt opna. Norsk Plan gratulerer med det flotte bygget og takkar for oppdraget med å utvikle den grafiske profilen. Det gler oss å sjå at profilen no syner igjen både utvendig og innvendig i sjølve bygget og i interiøret.
Oppdragsgjevarane i Etne var bevisste på at den grafiske profilen skulle liggje i botn heilt frå starten av, då det skulle gjerast ein omfattande jobb med å skape entusiasme og begeistring for prosjektet, både hjå sponsorar, bidragsytarar og Etnebuen generelt. Den grafiske profilen har blitt brukt bevisst i omdømmebygginga; på T-skjorter, i brosjyrar og annonser, på nettsida, i presentasjonar m.m., og har bidrege til at prosjektet har vore lett å kjenne igjen.
Utarbeiding av grafisk profil
Å utarbeide ein grafisk profil inneber at vi gjennom bilde og tekst lagar ei felles visuell utforming for bedrifta eller organisasjonen. Arbeidet inneber val av fargar, fontar, tekst og logobruk, og sluttresultatet – den grafiske profilen – inneheld ein designmal som viser korleis det grafiske uttrykket skal brukast i ulike produkt, for eksempel annonser, webside, visittkort, og kundemagasin.
Dersom den grafiske profilen ligg i botnen, som eit fundament, vert det enklare å utvikle nye produkt, og bedrifta vil framstå med ein tydleg profil som er lett å kjenne igjen.
Gjennom god design kan du skaffe deg eit konkurransefortrinn!
Får ringverknader for lokalt næringsliv
by Elin Moen Karlsen - journalist on februar 7, 2012
Ritlandskrateret i Hjelmeland kjem til å få ringverknader både for næringslivet lokalt i Hjelmeland, men også for næringslivet i Ryfylke, trur prosjektleiar Linda Liem.
- NATUR OG NÆRINGSLIV: Ritlandskrateret i Hjelmelandsheia kan få positive ringverknader for næringslivet i Ryfylke-regionen, meiner prosjektleiaren. (Foto: Knut S. Vindfallet)
Allereie har prosjektet Ritlandskrateret gitt arbeid for lokalt næringsliv. Kommunikasjonsbedrifta Norsk Plan i Suldal skal utarbeide grafisk profil, nettside og informasjonsmateriell for prosjektet.
– Vi trengte ei bedrift som dreiv med kommunikasjon, og då var det naturleg for oss å velje ei bedrift frå regionen, slår prosjektleiar i Hjelmeland Vekst, Linda Liem, fast.
– Vi er medvitne på at det er viktig å bruke dei regionale ressursane som finst i Ryfylke, held ho fram.
– Eg ser fram til å ta fatt på den utfordrande oppgåva med å synleggjera eit stykke spennande Ryfylkehistorie, seier grafisk formgjevar Astrid Eidhammer Hjelmeland i Norsk Plan, som skal leie utviklinga med den grafiske profilen.
Unikt område
For mellom 500 og 600 millionar år sidan trefte ein meteor med ein diameter på rundt 100 meter jordoverflata i Hjelmelandsheia med ein fart på rundt 25 kilometer i sekundet. Meteoren laga eit krater som var 2500 meter breidt og 350 meter djupt. Hjelmelandsprisvinnar og geolog Fridtjof Riis oppdaga krateret for første gong i 1985, og har sidan jobba med å få verifisere krateret som eit meteorittnedslag, noko han lukkast med i 2009. Slike meteorkratere er det bare tre av i Noreg og 175 i verda.
Prosjektet Ritlandskrateret varer i første omgang fram til sommaren 2013. Fram til då skal prosjektleiar Linda Liem, i samarbeid med fleire, mellom anna, Statens Naturoppsyn, Fylkesmannen i Rogaland, Stavanger Turistforening, Hjelmeland kommune, grunneigarar og lokalt næringsliv, prøve å lage ein langsiktig plan for kva som skal gjerast i området.
– Vi satsar på å ha nettsida og brosjyrene klare nå til sommaren. Dette er eit område som mange allereie nyttar, men vi må fortelje dei historia som gjer området så spennande og interessant, seier Liem.
Tilgjengeleg
Ritlandskrateret ligg rundt 45 minutter til fots frå parkeringsplassen på Kleivaland, på veg opp mot turistforeiningshytta Melands Grøna Hei. Her er det både god sti og traktorveg å kome fram på.
Liem kan fortelje at det er tankar om eit besøkssenteret for Ritlandskrateret på Hjelmeland, og ho kan også fortelje at dei ønskjer lokale guidar som kan lose folk til og gjennom området. Dei har allereie blitt kontakta av lokale personar og bedrifter som ønskjer denne jobben. I dag finst det ei utstilling om krateret og området på Sande Næringsbygg på Hjelmeland.
– Vandrarpresten ved Ingebjørg Vik Laugaland, Reidunn Ferstad frå Trodla-Tysdal og spahotellet har vist interesse for å vere guidar for turar til Ritlandskrateret, fortel Liem.
Ho trur ikkje at Ritlandskrateret kjem til å bli like stort som Preikestolen, men trur området kan få stor betydning for Hjelmeland kommune.
– Ritlandkrateret og Preikestolen er to forskjellige naturattraksjonar i Ryfylke. Preikestolen er først og fremst ei spektakulær naturoppleving som trekkjer mange folk, medan Ritlandkrateret har ei spektalulær historie og er spesielt attraktiv for dei som ei interessert i natur og naturvitskap, slår Liem fast.
Nye Joomla! er på plass
by Toyni Tobekk - web on januar 26, 2012
Joomla! 2.5 finst på nynorsk og bokmål, og sjølvsagt på ei lang rekkje språk utanom norsk.
Denne veka kom den heilt nye Joomla! 2.5.
Kva vil dette bety for deg som kunde hjå oss?
Mange av våre kundar brukar den versjonen av Joomla! som heiter 1.5. Den vil bli avvikla utpå våren. Nettsida di vil framleis verke, og du kan halde fram med å oppdatere sida di som før. Men det blir ikkje brukt ressursar på fleire sikkerheitsutgivingar. Det klokaste å gjere er å oppgradere til nye Joomla 2.5. Det kan vi hjelpe deg med.
Dei av kundane våre som har fått laga nettsider siste halve året har stort sett fått eit Joomla-system som er tilpassa den nye versjonen, og som derfor berre treng små oppdateringar for å bli heilt ajour. Det kan vi også hjelpe deg med.
Kva er Joomla?
Joomla er eit cms, eit publiseringssystem for nettsider. Dei aller fleste som kjøper nettsider hjå oss, får installert Joomla slik at dei enkelt og greitt kan redigere heimesidene side sjølve.
Joomla! er fri programvare utvikla av brukarar og utviklarar over heile verda. Ordet «jumla» kjem frå Swahili og betyr «all together» eller «som ein heilskap». Joomla! er eit av verdas mest brukte publiseringssystem, og her til lands finst det både på nynorsk, bokmål og til dels på samisk.
Du kan lese meir om Joomla! på heimesidene til den norske Joomla-foreninga, Joomla i Norge.
Lett tilgjengelege pressefoto
by Elin Moen Karlsen - journalist on januar 19, 2012
Det finst mange nettsider med gode og lett tilgjengelege presserom. Samlaget sine nettsider er eit godt døme på dette.
Dette er eit lite hjartesukk frå ein journalist som skriv for nett.
Eg skulle ønskje alle institusjonar, private eller offentlege, hadde hatt eit presserom som var lett å finne på framsida på nettsida deira. Eg skulle også ønskje at det i desse presseromma var lett å finne høgoppløyselege bilete av personar som jobbar ved insitusjonen, frå sjølve bygningen til instusjonen eller andre situasjonsbilete, som kan fortelje noko om institusjonen. La det gjerne kome fram kven som har tatt bileta, slik
at krediteringa også blir riktig. Bilete i både høgde- og breiddeformat er også
ønskjeleg.
Dette skjedde for nokre veker sidan; eg skreiv om ein ny instistusjonsleiar for LNK.no. Når ein skriv ei slik sak er det alltid greitt å ha med eit bilete som viser andletet til nettopp den nye leiaren. Eg klarte ikkje å finne noko brukande bilete av den nye leiaren på nettsida deira. Eg trengte eit bilete i breiddeformat, ikkje eit tommelfingerstort foto i høgdeformat, som blei stygt og kornete då eg prøvde å gjere det større og brukbart.
Eg prøvde å få tak i den nye leiaren sjølv, men han var ikkje tilgjengeleg. Til slutt blei eg sett over til ein hyggeleg informasjonsansvarleg, som kunne hjelpe. Han kunne fortelje at det var heilt tilfeldig at han kunne hjelpe, fordi han nettopp sjølv hadde blitt fortald kvar han kunne finne eit slikt bilete som eg var på jakt etter. Korleis kan ein forvente at ein person som er innom for første gong skal klare å finne det han
eller ho treng, når ikkje dei som jobbar for institusjonen klarer å finne fram?
Eit anna døme var då eg skulle ha bilete av leiaren i eit forbund. Då klarte eg heller ikkje finne eit brukbart bilete på nettsida. Eg ringte informasjonsansvarleg, og blei fortald at eg kunne finne bileta eg trengte på Flickr. Knallbra, tenkte eg, for då visste eg at dei var i høg nok oppløysing. Eg fann det eg trengte, men hadde dei ikkje bare kunna vise til Flickr i presserommet på nettsida? Kanskje gjorde dei det, men ikkje på ein måte som ein lettare forvirra nettjournalist utan vidare kunne finne fram til.
Eg har mange fleire gonger opplevd å gå meg heilt vill på uoversiktelege nettsider. Ja, eg kan bare plukke opp telefonen og ringe og få svar frå ein eller annan pressekontakt, men då tar det som skal ta fem minutt, ofte ein eller to timar eller kanskje to dagar! Når du skriv for nett kan du ikkje vente ein time, to timar eller til i morgon. Niks! Du skal ha det du treng nå!
Å ha eit lett tilgjengeleg presserom er noko alle vil tene på, er mi bastante meining, så kvifor ikkje nytte litt ressursar på eit presserom som er lett å finne og bruke.
Og til dykk som sender ut pressemelding: Send med eit høgoppløyseleg bilete!
På førehand – takk!
Ei nettside som fungerer
by Bente Kjos-Wenjum - dagleg leiar on januar 16, 2012
Bygda Jøsneset i Hjelmeland etablerte seg med nettside i 2008. Bruken av nettsida har auka gradvis heilt frå oppstartinga, og dei kan notere seg med ny toppnotering for 2012.
- Sida vår er «smal»og målgruppa for denne bygdesida er relativt lita. Statistikken viser at nettsida vår er ein kanal som når ut, kan ein lesa på jøsneset.no
Statistikken syner 6253 unike brukarar i 2011 og eit snitt på 50 brukarar pr dag, noko som er ganske imponerande for ei bygd med 70 husstandar! Jøsneset.no kan og skilte med langvegsfarande besøk: «Framleis er det sjølvsagt brukarar i Norge som tronar på topp av gjestelisa vår, med Europeiske land og USA på dei neste plassene. Deretter er det faktisk Russland og Finland som kjem på dei neste plassene, og deretter Japan! Men me har over 50 land på besøkslista vår, alt frå Island til Quatar, frå Polen til Venezuela, India og Kazakstan; så på den måten når vesle Jøsneset ut i den store verda.»
Og kvifor fungerer det så godt på Jøsneset?
Initiativtakarane var svært bevisste på kva dei ville oppnå med bygdesida, seier webutviklar Lars Skipevåg i Norsk Plan. – Dei ville etablera ein ny kanal i bygda, som var lett tilgjengeleg for alle innbyggjarane og som alltid var open. Ein stor bonus er sjølvsagt at nettsida og er tilgjengeleg for skuleelevar, utflyttarar og hyttefolk som er interesserte i kva som rører seg i bygda.
Jamlege og hyppige oppdateringar er og viktig sjølvsagt. Stoffet er ultralokalt, akkurat slikt vi likar å lese om heimplassen vår.
Sivle på forfattarnettet
by Elin Moen Karlsen - journalist on januar 14, 2012
Foto: er henta frå "Eit halvt liv. Ein biografi om Per Sivle", av Alfred Fidjestøl, Det Norske Samlaget, 2007
Over 100 år etter sin død får den norske diktaren og forfattaren Per Sivle nå si eiga nettside og blir ein del av Forfattarnett.no saman med Hulda og Arne Garborg, Rasmus Løland og Olav H. Hauge.
Nettsidene på Forfattarnett.no inneheld både tekstar om og av forfattarane, samt bilete, lyd- og filmopptak.
Forfattarnett.no skal gi grundige presentasjonar av utvalde forfattarar. Her finn du kunnskap om både forfattaren og forfattarskapen. Målgruppa er skuleelevar, studentar og andre litteraturinteresserte.
- Me er stolte av å ha utvikla Forfattarnett.no, og målet er at dette skal bli ein omfattande portal som presenterer norske forfattarar, seier Bente Kjos-Wenjum i Norsk Plan.
Per Sivle (1857-1904) mista mora si tidleg og heidra minnet hennar med diktet «Den fyrste song», som sidan har blitt ein av Noregs kjæraste songskattar. Han blei fødd i Flåm i Sogn og Fjordane, men blei sendt i fosterheim til garden Brekke på Voss. Andre døme på Sivle sin forfattarskap er dikta «Vesle lerka», «Tord Foleson» og «Vi vil oss eit land».
Når Sivle blir ein del av Forfattarnett.no, er fire av dei fem forfattarane som dannar ryggraden i Diktarvegen presentert på portalen.
Ta kontakt dersom du treng meir informasjon om forfattarportalen. Kanskje kjenner du til ein forfattar som kunne vore presentert?
Ta vare på originalfoto
by Astrid Eidhammer Hjelmeland - formgjevar on januar 9, 2012
Eit nyårsforsett for bedrifter og privatpersonar bør vera å ta vare på originalfoto ein har tenkt å nytta vidare til produksjon eller utskrift.
For oss som jobbar med å utforma trykksaker er det heilt avgjerande at biletkvaliteten på foto me nyttar er optimal. Det vil seia at ppi (pixels per inch) er 300 – 500 for trykk av brosjyrar og magasin, medan det for avistrykk held med 200 ppi.
Privatpersonar og bedrifter sit ofte på bilete dei ynskjer å nytta til ulike formål.
Men det er nok fleire som har opplevd at originalbileta i høg oppløysing 2-3 Mb har blitt ”vekke”, og at bileta ein sit att med ikkje er større 150 Kb. Dette gir eit dårleg grunnlag for vidare fotobehandling.
Gode bilete er utgangspunktet for gode trykksaker, det vil seia alt frå visittkort, brosjyrar, magasin og aviser.
Medan ein på nettsider nyttar lågoppløyselege bilete er det avgjerande for kvaliteten på bileta i ein trykksak at bileta er både skarpe (i fokus) men ikkje minst at dei har ei oppløysing som er høg.
Er bileta blitt komprimerte i ein epost, er dei ikkje lenger brukande til trykksaker. Då er det lurt å ha originalbiletet godt lagra på eiga maskin.
Tips for å ta vare på originalbileta dine:
– Hugs å ha innstillinga på fotoapparatet på best mogleg kvalitet (JPEG-fine)
– Lag deg ei ekstra mappe/biletbank på datamaskinen din, der du alltid lagrar originalbileta dine.
– Ha ein ekstra back-up av originalbileta anten på ekstern hard-disk eller på nett.
– Ver bevisst på kva du takkar ja til når du sender epost. Dersom epost-programmet ditt spør om du vil komprimera svar nei. I tilfelle ja, må du vera sikker på at du tar vare på originalfoto.
– Send heller bileta i fleire sendingar dersom det vert for store filer.
– Nytt gratis deleprogrammet Dropbox for å overføra store bilete.
– Ikkje legg fotofila inn i eit word-dokument før du sender. Legg ved fotofila direkte i eposten. (legg til fil – hent fila på maskina di)
– Gratis fotoredigeringsprogram:
XNView: med forklaringsvideo her.
PICASA: med forklaringsvideo her.
Smørblid
by Elin Moen Karlsen - journalist on desember 19, 2011
Eg skulle i butikken for å kjøpe flurotablettar med raudt lok. Ikkje dei med oransje, nei, nå ville det vesle trollet ha med raudt lok. Javel.
På veg inn i butikken fann eg meg sjølv styrande direkte mot kjøleskåpet med mjølkeprodukt. Javel. Men det var nå ein gong fluortablettar eg skulle ha då. Dei er i alle fall ikkje i den enden av butikken.
Men eg var ikkje lenger herre over mine eigne føter. Mot kjøleskåpet gjekk dei.
Og der! Heilt nedst i det eine kjøleskået. Pakka inn i gull, skinande, ein liten flokk med smørpakkar. Det var ikkje så mykje anna enn desse gullskimrande pakkane i botnen av kjøleskåpet. Dei såg litt einsame ut.
Trong eg dei? Nei, ikkje eigentleg og ikkje sånn heilt umiddelbart. Kanskje, viss eg skulle lage ei ny ladning med kakemenn, eller kanskje viss eg skulle steike noko?
Eg tok to pakkar. Gjekk nøgd derifrå.
Hei! Stopp! Kva skjer?
Eg har i fleire veker lese overskrifter på nett og papir om tome smørhyller, 500 grams smørpakkar til 500 kroner stykket på Finn.no og sist i går kveld var det ei venninne som kunne røpe på Facebook at på akkurat den butikken eg valde å handle i i dag, der var det smør å få kjøpe! Ein butikk eg veldig sjeldan går i. I alle fall ikkje for å kjøper smør.
Eg har alltid vore av typen som ikkje har gidda å bry meg om store og små, medie- og folkeskapte kriser.
Eg handlar aldri inn 20 brød, 40 liter mjølk, to kilo sjokolade, fem kassar brus, fire kilo mandariner og fire kilo med ost, sjølv om eg veit at det kjem fleire, butikkstengte helligdagar etter kvarandre. Eg har rett og slett nekta å la meg påverke av panikken.
Heilt til nå…
Var det eit medvite val eg gjorde, då eg valde å handle akkurat i denne butikken eg visste hadde smør i går kveld? Den butikken eg nesten aldri handlar i til vanleg?
Eg skulle jo bare ha fluortablettar. Hadde dei flurotablettar? Nei, det hadde dei ikkje.
Jammen, sa eg smør!
Men, veit dykk kva det beste av alt er? Det var plantemargarin eg kjøpte! Det er den sorten eg alltid kjøper. Det er jo eigentleg feil sort smør. Feil sort å få panikk for, i alle fall. Likevel, nå? Nå er eg bare smørblid!
Snakkar om det – kva betyr det?
by Toyni Tobekk - web on desember 13, 2011
Du har sikkert registrert at det står «XX snakkar om det» (Talking about this) i venstre marg på Facebooksider. Men kva betyr det eigentleg at nokon «snakkar om» sida di?
Det betyr at å mange menneske involverer seg i innhaldet ditt på ein eller fleire måter: dei likar sida di, skriv på tavla di, liker/kommenterer/deler innhald på tavla di, svarar på eit spørsmål du har stilt, svarar på ein invitasjon til ei hending du har oppretta, likar/deler innsjekking på plassen din eller sjekkar inn hjå deg.
I sum: involverer seg i det du deler på Facebook.
Talking about this kan du finne igjen i statistikken for sida di, under insights.
Vi styrker kompetansen vår
by Toyni Tobekk - web on november 29, 2011
Vi i Norsk Plan vil gjerne bli flinkare, på alle område. Jo meir vi kan, jo betre kan vi hjelpe deg.
I desse dagar driv derfor formgjevaren vår Astrid og vidareutdannar seg innafor grafisk design. Ved sidan av jobben tar ho no studiet grafisk design med prosjektleiing på IGM i Oslo, eit halvårs-studium som gir 30 studiepoeng. Studiet tar for seg emne som bildekommunikasjon, typografi og prosjektleiing med vekt på strategiske val for grafisk design, og det blir eksamen i juni 2012!
